Þann 27. ágúst sl. rann út frestur til að skila umsókn um embætti fiskistofustjóra, en fráfarandi fiskistofustjóri, Árni Múli Jónasson, hefur verið ráðinn bæjarstjóri á Akranesi. Embættið er greinilega eftirsóknarvert því 22 sóttust eftir því.

Umsækjendur voru Aðalsteinn Þorsteinsson, Dagmar Sigurðardóttir, Davíð Egilson, Eyþór Björnsson, Gísli Rúnar Gíslason, Grétar Mar Jónsson, Guðmundur Einar Jónsson, Gylfi Ástbjartsson, Halldór Ó. Zoëga, Haukur Nikulásson, Ingólfur Sveinsson, Jón Örn Stefánsson, Pétur Bjarnason, Sævar Ásgeirsson, Valbjörn Steingrímsson, Valtýr Hreiðarsson, Viðar Ólason, Vilhjálmur Wium, Þorsteinn Þorsteinsson, Þórður Már Jónsson, Þórður Heimir Sveinsson og Þórhallur Ottesen. Ráðið verður í stöðuna innan tíðar.

Ungir jafnaðarmenn vilja Jón Bjarnason burt úr ríkisstjórninni hið fyrsta. Segja þeir að ráðherrann sé ófær um að starfa í ríkisstjórninni, hann starfi gegn stjórnarsáttmálanum, bæði með rangfærslum um aðildarsamninga við Evrópusambandið og andstöðu við hagræðingu með fækkun ráðuneyta.

Hvalveiðarnar hafa gengið mjög vel í sumar og hafa veiðst 89 hvalir til þessa sem er heldur meira en á sama tíma í fyrra. Gott veður hefur verið lengst af tímabilsins svo gefið hefur til veiðanna mestan hluta veiðitímans en hvalveiðivertíðin hófst 10 dögum síðar en í fyrra. Það er því nokkuð líf í Hvalstöðinni flesta daga um þessar mundir.

Nýlega hófst verkefni á vegum Héðins, HB-Granda og hjá Matís sem miðar að því að nýta rafmagn til að hita loft fyrir þurrkun á fiskmjöli á hagkvæman hátt. Með því móti væri mögulegt að ná því markmiði sjávarútvegsins að nýta eingöngu innlenda orku við framleiðslu fiskmjöls og draga verulega úr innflutningi á olíu til landvinnslu. Flestar íslensku fiskmjölsverksmiðjurnar voru byggðar á síldarárunum (1950-1965). Á þeim árum var orðið orkusparnaður nær óþekkt hugtak og olíuverð lágt, miðað við það sem það er nú til dags. Í fiskimjölsiðnaðinum hafa verið notaðir eldþurrkarar, loftþurrkarar og gufuþurrkarar. Notkun á eldþurrkurum fer þó minnkandi, þar sem bæði loft og gufuþurrkarar skila auknum gæðum í lokaafurð ásamt því að vera hagkvæmari í rekstri með tilliti til umhverfismengunar, orkunotkunar og vinnslustjórnunar.

Ísland er í í fullum rétti til að veiða makríl innan íslenslu efnahagslögsögunnar, rétt eins og Norðmenn og aðildarríki Evrópusambandsins hafa rétt til makrílveiða innan sinna eigin efnahagslögsagna. Makrílveiðar Íslendinga eru því jafnlögmætar og makrílveiðar Noregs og Evrópusambandsríkjanna að mati Landssamband íslenskra útvegsmanna. Í fréttatilkynningu frá  samtökum í sjávarútvegi í Noregi og inann Evrópusambandsins er því lýst yfir að makrílveiðar Íslendinga innan íslensku efnahagslögsögunnar séu óábyrgar. Að baki tilkynningunni standa European Association of Fish Producers Organisations, Norwegian Fishermen's Association, Norwegian Seafood Federation, Norges Fiskarlag og Fiskeri- og havbruksnæringens landsforening í Noregi. Þessar ásakanir segir LÍÚ með öllu rakalausar.