Bjartsýni ríkir um markaðshorfur og verð á grásleppuhrognum

Veiðitímabilið á grásleppuvertíðinni 2010 verði verði aldrei lengra en 70 dagar á hverju veiðisvæði, veiðidagar verði 50 og byrjunartími 20. mars á veiðisvæðum E og F. Þetta segir í samþykkt aðalfundar Fonts, félags smábátaeigenda á Norðausturlandi en þar varð mikil og löng umræða um grásleppuveiðar, enda flestir félagsmanna sem eiga mikið undir að þær gangi vel. Á síðustu vertíð var fjórðungur heildargrásleppuaflans hér við land veiddur á félagssvæði Fonts, tæpar 3000 tunnur. Um helmingur heimsafla af grásleppuhrognum, eða 11.600 tunnur, kom frá Íslandi á síðasta ári að verðmæti um 2,5 milljarðar króna og meðalverð á tunnu um 148 þúsund krónur en fór hæst í um 270 þúsund krónur. Markaðshorfur í ár eru mjög góðar en verðþróun er fremur óljós. Aðrar helstu gráleppuveiðiþjóðirnar eru Nýfundnaland, Noregur og Grænland. Talið er að markaður sé fyrir allt að 30 þúsund tunnur af grásleppuhrognum.

Samkvæmt útflutningstölum var meðalfobverð á gráslepputunnunni á síðasta ári um 849 evrur eða 148 þúsund krónur íslenskar en var 697 evrur árið 2008. Þá hækkaði kavíarinn í verði um 17% í evrum. Grásleppuhrogn og kavíar eru eina sjávarafurðirnar sem hafa hækkað svo mikið í erlendri mynt milli ára. Á síðasta ári var lagt upp með það að grásleppuveiðin mætti standa í 50 daga hjá hverjum og einum og var þá miðað við samfellt úthald. Sjávarútvegsráðherra bætti síðan við 12 dögum.

Landssamband smábátaeigenda hefur lagt til við sjávarútvegsráðherra að grásleppuvertíðin verði í 60 daga í ár og megi hefjast 10. mars nk.  á öllum veiðisvæðum nema við Reykjanes en þar mætti byrja 1. mars eins og verið hefur undanfarin ár. Sjávarútvegsráðherra hefur ákveðið að veiðidagar verði 62. Árið 2009 voru 277 bátar með veiðileyfi á grásleppu og hafði fjölgað umtalsvert milli ára og gert er ráð fyrir að þeim fjölgi eitthvað í ár.